მთავარი » 2011 » მაისი » 12 » ოცდაათი წლის შემდეგ - დიდი სტუმრიანობა თბილისში
10:37 PM
ოცდაათი წლის შემდეგ - დიდი სტუმრიანობა თბილისში
თბილისის "დინამოს” მიერ 1981 წელს ევროპის თასების თასის მოგებასთან გასამართ საუბილეო საღამოზე, რომელსაც ორგანიზებას საქართველოს ყველაზე ტიტულოვანი კლუბი უწევს, ფილარმონიის დიდ საკონცერტო დარბაზში ბევრი ცნობილი საფეხბურთო მოღვაწის სტუმრობაა მოსალოდნელი. "დინამოს” პრეს-ატაშის გიგა გვენცაძის ცნობით, უკვე თბილისში იმყოფება ხორვატიის ახალგაზრდული ნაკრების ამჟამინდელი და თბილისელთა ყოფილი თავკაცი ივო შუშაკი. ხვალ ჩამოვა ჩეხეთის ეროვნული ნაკრების ყოფილი დამრიგებელი დუშან უჰრინი, რომლის ხელმძღვანელობითაც "დინამომ” საქართველოს ჩემპიონის ბოლო ტიტული მოიპოვა. მათ გარდა, საიუბილეო საღამოს დაესწრება 1981 წლის ფინალში, იენის "კარლ ცაისის” კაპიტანი ლოთარ კურბივაიტი. მასთან ერთად იქნება გერმანიის საფეხბურთო კავშირის ვიცე-პრეზიდენტი რაინერ მილკორაიტი. უკრაინიდან თბილისს ეწვევიან კიევის "დინამოს” ვეტერანი ფეხბურთელები - ანდრეი ბიბა და ვლადიმერ მუნტიანი. აზერბაიჯანიდან ჩამოვლენ ბაქოს "ნეფთჩის” ყოფილი მოთამაშეები ისკანდერ ჯავადოვი და მაშალა ახმედოვი. სომხეთიდან გამოეშურება ერევნის "არარატისა” და საბჭოთა კავშირის ექსნახევარმცველი ხორენ ოგანესიანი. ღონისძიებას გასაშუქებლად ეწვევა "ნტვ ფუტბოლის” ჟურნალისტი ალექსეი ანდრონოვი. სხვათაშორის, საქართველოს ფარგლებს გარედან ჩამოსვლა არა მხოლოდ უცხოელ სტუმრებს მოუწიათ – მომავალი ღონისძიებისთვის, სოჭიდან სპეციალურად ჩამოფრინდა თბილისის "დინამოსა” და საბჭოთა კავშირის ნაკრების ყოფილი ნახევარმცველი გიორგი სიჭინავა. უცხოელი სტუმრები ხვალ, 12:00 საათზე, "დინამოს” დიღმის საწვრთნელ ბაზას ეწვევიან და იქ მიმდინარე სარეკონსტრუქციო სამუშაოებს დაათვალიერებენ. საღამოს 19:00 საათზე კი, ფილარმონიის დიდ საკონცერტო დარბაზში, საიუბილეო თარიღისადმი მიძღვნილი საღამო შედგება.