მახაჩყალის "ანჟის” მთავარი მწვრთნელი, გაჯი გაჯიევი ადასტურებს, რომ მისი კლუბის ხელმძღვანელი პირები იტალიური "მილანის” ნახევარმცველთან, ჯენარო გატუზოსთან აწარმოებდნენ მოლაპარაკებებს. ბოლო დროს, იტალიურ და რუსულ პრესაში არაერთხელ გაჟღერდა 33 წლის ნახევარმცველის მახაჩყალაში შესაძლო გადასვლის შესახებ ინფორმაცია. "ანჟის” მთავარი მწვრთნელის განცხადებით, გატუზო თავად იყო ჩასული დაღესტანში მახაჩყალელებთან მოლაპარაკების საწარმოებლად. "ვერ გეტყვით, გატუზოს თვითმფრინავი გაუგზავნეს, თუ თავად ჩამოფრინდა ჩვენთან, მაგრამ ვიცი, რომ იგი ჩამოსული იყო მოლაპარაკებების საწარმოებლად. არც ის ვიცი, ამჟამად გრძელდება თუ არა მოლაპარაკებები” – ციტირებს გაჯი გაჯიევის სიტყვებს Sport Segodnya.
