როგორც მოსალოდნელი იყო, სერია A-ს 35-ე ტურში, „მილანმა" თითქმის უმოტივაციოდ მოთამაშე „ბოლონია" დაამარცხა და ახლა, მასიმილიანო ალეგრის შეგირდები, სკუდეტოსგან უკვე ერთი ხელის გაწვდენაზე არიან. იმისათვის, რომ შვიდწლიანი პაუზის შემდეგ, „როსონერიმ" კვლავ იზეიმოს ჩემპიონობა, მილანელებს მხოლოდ ერთი მოგება სჭირდებათ.
მიუხედავად არაერთი სახიფათო მომენტისა, „სან სიროზე" გამართულ მატჩში, „მილანი" მხოლოდ ერთ გოლს დასჯერდა. შეხვედრის სტარტზე, შეტევაში ძალიან კარგად მოთამაშე ფლამინი მეკარესთან პირისპირ გავიდა და მართალია, ვივიანომ მას პირველი დარტყმა აუღო, მაგრამ დამატებაზე კვლავ ფრანგმა თავდამსხმელმა ითამაშა, რომელმაც ცარიელ კარში ბურთის შეგორებით, შეხვედრის ერთადერთი გოლი გაიტანა.
მოულოდნელად, ძალიან დაძაბული გამოდგა „ბარისა" და „რომას" შორის გამართული მატჩი. დედაქალაქური გუნდი რომ 3 ქულისთვის იბრძოლებდა, ეს თავიდანვე ნათელი იყო, რადგან „ჯალოროსი", ერთის მხრივ, ევროპის ლიგაზე გასმვლელი ადგილის შენარჩუნებას ცდილობს და მეორეს მხრივ, ჩემპიონთა ლიგას უმიზნებს. გასაკვირი ის იყო, რომ სერია B-ში ოფიციალურად გავარდნილმა „ბარიმ" მეტოქეს უშეღავათო ბრძოლა გაუმართლა და კინაღამ ქულებიც დააკარგვინა.
ტურის ბოლო შეხვედრაში, ანგარიში 25-ე წუთზე გაიხსნა, როდესაც რომაელი ფეხბურთელის მიერ საკუთარ საჯარიმოში ხელით თამაშისთვის დანიშნული პენალტი გოლად ბენტავოლიომ აქცია. ანგარიში ხუთ წუთში გათანაბრდა და რა გასაკვირია, რომ მასპინძელთა კარის ბადე ტოტიმ შეარხია. „რომას" უბერებელმა კაპიტანმა საჯარიმო დარტყმით იხეირა. პირველი ტაიმი მაინც მასპინძელთა უპირატესობით დასრულდა - 42-ე წუთზე, რომეროს მიერ მარჯვენა ფლანგიდან ჩაწოდებულ ბურთს თავი ჰუზეკლოპმა დაუხვედრა და ეფექტური გოლი გაიტანა.
მეორე ნახევარი ახალი დაწყებული იყო, როდესაც მეტოქისთვის სახეში იდაყვის ჩარტყმის გამო, დე როსიმ წითელი ბარათი მიიღო და რომაელები რთულ მდგომარეობაში აღმოჩნდნენ, თუმცა ანგარიშის კვლავ გათანაბრება მათ მაინც მოახერხეს. 57-ე წუთზე, ჟუანის წაქცევისთვის თერთმეტმეტრიანი დაინიშნა, რომელიც გოლად ტოტიმ გარდასახა. 78-ე წუთზე, საკუთარ საჯარიმოში წესების დარღვევის გამო, გლიკი წითელი ბარათით, ხოლო „ბარი" პენალტით დაისაჯა და თითქოს „რომას" 3 ქულის მოპოვება აღარ უნდა გასჭირვებოდა, მაგრამ 11 მეტრიდან, ტოტიმ ბურთი ძელს გაარტყა. შეხვედრის დამატებულ წუთზე, „რომას" მე-2 ფეხბურთელიც გაუგდეს. მეტოქისთვის ხელის დარტყმის გამო, მოედანი პეროტას დაატოვებინეს. როგორც ჩანს, დედაქალაქელებს კაცნაკლული თამაში უკეთესად გამოსდით. 9 კაცით დარჩენიდან მცირე ხანში, რიისეს მიერ მარცხენა ფლანგიდან ჩაწოდებულ ბურთზე როზიმ ითამაშა, რომელიც 3 ქულის მომტანი გოლის ავტორი გახდა.
ბარიში მოგება „რომასთვის" ძალიან მნიშვნელოვანი იყო, რადგან მისი უშუალო კონკურენტები, „ლაციო" და „იუვენტუსი" დღეს, ერთმანეთს ეთამაშებიან. ტურინელთა ვერმოგების შემთხვევაში, „ჯალოროსი" ევროპის ლიგის საგზურს თითქმის გაინაღდებს, ხოლო თუ „ლაციომ" დაკარგა ქულები, „რომას" მე-4 ადგილზე გასვლის შანსები გაეზრდება.
35-ე ტური იტალიაში დრამატული მატჩების სიმრავლით იყო გამორჩეული. ერთ-ერთი ასეთი შეხვედრა გაიმართა გენუაში, სადაც სერია A-ში ადგილის შენარჩუნებისთვის მებრძოლი „სამპდორია" და „ბრეშია" დაუპირისპირდნენ ერთმანეთს. მიუხედავად იმისა, რომ სტუმრები 3-ჯერ იგებდნენ, მასპინძლებმა მაინც მოახერხეს მნიშვნელოვანი ქულის მოპოვება.
სერია A-ში დარჩენა ფაქტობრივად გაინაღდა „კატანიამ", რომელმაც მიუხედავად 10 კაცით თამაშისა, უმოტივაციოდ მყოფ „კალიარის" მაინც სძლია. მატჩის მიწურულს, ოთხწუთიან მონაკვეთში, სარდინიელთა კარში გოლები სილვესტრემ და ბერგესიომ გაიტანეს.