"ტოტენჰემი” ფანების რასისტული შეძახილების გამო შესაძლოა მკაცრად დაისაჯოს. უეფა ორიოდ დღის წინ მადრიდში ჩატარებული ჩემპიონთა ლიგის მეოთხედფინალური მატჩის დროს ინგლისელი ქომაგების საქციელს უახლოეს დღეებში განიხილავს და თუ წინასწარი ინფორმაცია დადასტურდა, მაშინ "ტოტენჰემს” მინიმუმ ფინანსური სანქცია არ ასცდება. The Sun-ის ცნობით, სტუმარი გულშემატკივრების სექტორიდან ლამის მთელი 90 წუთის განმავლობაში შეუწყვეტლივ ისმოდა "რეალის” შავკანიანი ფორვარდის, ემანუელ ადებაიორისა და მისი მშობლების შეურაცხმყოფელი შეძახილები და სიმღერები. მიმომხილველები ამ აგრესიის ერთ-ერთ მიზეზად იმას ასახელებენ, რომ ადებაიორი "სამეფო კლუბში” გადასვლამდე ლონდონის "არსენალის” ღირსებას იცავდა. "არსენალისა” და "ტოტენჰემის” გულშემატკივრები კი ერთმანეთს გამორჩეულად ემტერებიან.
