"სოხუმი” ერთ-ერთი იმ გუნდთაგანია, რომელმაც საქართველოს ვაჟ კალათბურთელთა მე-20 ეროვნული ჩემპიონატის ფლეი ოფში თამაშის უფლება ვადაზე ადრე მოიპოვა. აღნიშნულ ეტაპზე, "სოხუმს” ლიტველი მძიმე ფორვარდი, პეტრას ბალოჩკა და ამერიკის სტუდენტურ ლიგაში მოასპარეზე ქართველი უკანახაზელი ლევან ფაცაცია დაემატებიან.
ამის შესახებ, "მსოფლიო სპორტს” "სოხუმის” მთავარი მწვრთნელის თანაშემწე ვაჟა კვარაცხელიამ განუცხადა.
შეგახსენებთ, რომ ბალოჩკა და ფაცაცია "სოხუმის” განაცხადში უკვე შეყვანილნი არიან. ლიტველმა კალათბურთელმა, მიმდინარე სეზონის რამდენიმე შეხვედრა "სოხუმის” მაისურით ჩაატარა და ამის შემდეგ კარიერა საფრანგეთის მე-3 დივიზიონის კლუბ "ლიევენში” გააგრძელა. საქართველოში ბალოჩკა "ლიევენისთვის” მიმდინარე საკალთბურთო სეზონის დასრულების შემდეგ დაბრუნდება.
რაც შეეხება ფაცაციას, იგი ამჟამად ამერიკაშია და საკალათბურთი კლუბ "ტროას” კოლეჯში სწავლობს. მართალია, ფაცაციას კლუბმა "ტროამ” სეზონი დაასრულა, მაგრამ ლევანი ამჯერად სწავლითაა დაკავებული და სამშობლოში დაბრუნება ამიტომ აგვიანდება.