დღეს ჩატარდა საქართველოს კალათბურთის ფედერაციის, სტკ-ს (სადისციპლინო ტექნიკური კომიტეტის) სხდომა, რომელმაც ნიკოლოზ ჩხატარაშვილსა ("ბათუმი”) და გიორგი გაბისონიას ("ავერსი”), ორ-ორ მატჩიანი დისკვალიფიკაცია გამოუტანა, ამის გარდა, ჩხატარაშვილი 100 დოლარის ექვივალენტი ლარით დაჯარიმდა. ამის შესახებ "მსოფლიო სპორტს” სტკ-ს თავმჯდომარე გია მიქაძემ განუცხადა. რადგან სუპერლიგის რეგულარული ჩემპიონატის დასრულებამდე 2 ტური დარჩა, ნიკოლოზ ჩხატარაშვილისთვის რეგულარული ჩემპიონატი უკვე დასრულდა. შეგახსენებთ, რომ საქართველოს ვაჟ კალათბურთელთა მე-20 ეროვნული ჩემპიონატის მე-2 წრის მე-9 ტურში, "არმია”-"ბათუმის” მატჩის დროს, ჩხატარაშვილი მოედნიდან მსაჯის სიტყვიერი შეურაცხყოფისთვის გააძევეს. ანალოგიური ქმედებისთვის, იგივე სასჯელი მიიღო გაბისონიამ რუსთავში თამაშისას, სადაც, ოთხ აპრილს, საქართველოს 18-წლამდელთა ჩემპიონატის მორიგ ტურში, "ავერსი” ადგილობრივ გუნდს ხვდებოდა.
|