თამამად შეიძლება ითქვას, რომ სამ აპრილს, "რომასა” და "იუვენტუსს” შორის გამართულ შეხვედრაში, ფილიპ მექსემ "ჯალოროსის” მაისურით უკანასკენლად ითამაშა. როგორც ცნობილია, ტრავმის გამო, მიმდინარე სეზონში, ფრანგი მცველი ვეღარ ითამაშებს, ხოლო როგორც დღეს გაირკვა, ზაფხულში, იგი კლუბს დატოვებს. "მივდივარ "რომაში” გატარებული 7 დაუვიწყარი წლის შემდეგ. გადაწყვეტილება საბოლოოა. კლუბს სეზონის ბოლოს დავტოვებ. რომში თავს ძალიან კარგად ვგრძნობ, მაგრამ მაინც გადავწყვიტე წასვლა. წინასწარ ვიტყვი, რომ ჩემი გადაწყვეტილება არანაირად არ უკავშირდება კლუბის ხელმძღვანელობის შეცვლას, ან გუნდის მთავარ მწვრთნელად ვინჩენცო მონტელას დანიშვნას. მწვრთნელთან შესანიშნავი ურთიერთობა მაქვს” – ციტირებს მექსეს სიტყვებს Football Italia. კითხვაზე, გადავა თუ არა იგი "მილანში”, მექსე შემდეგნაირად პასუხობს: "ჯერჯერობით არაა გადაწყვეტილი, თუ სად განვაგრძობ კარიერას. თუმცა, ყველა ჩემს "მილანში” გადასვლაზე საუბრობს”. ფილიპ მექსე "რომაში” 2004 წლიდან თამაშობს. სერია A-ში ჩატარებულ 161 მატჩში, მას 12 გოლი აქვს გატანილი.
|