გიორგი შერმადინისა და ვლადიმერ ბოისას "ოლიმპიამ” სლოვენიის საკალათბურთო ჩემპიონატში პირველი მარცხი იწვნია. ქართველთა კლუბი ლიუბლიანურ დერბიში "გეოპლინ სლოვანს” ეწვია და სენსაციურად – 69:70 წააგო.
საქართველოს ეროვნული ნაკრების წევრები "ოლიმპიას” სასტარტო ხუთეულში გამოჩნდნენ, თუმცა, დიდხანს არ უთამაშიათ. ბოისამ მოედანზე 14:23 წუთი დაჰყო და 6 ქულა, 2 მოხსნა და 1 პასი მოაგროვა. ვოვამ 3-დან 1 ორქულიანი და 7-დან 4 საჯარიმო ჩააგდო, 2 სამქულიანი ააცილა, ერთი პერსონალური ფოლი მიიღო, მის წინააღმდეგ კი ოთხჯერ დაჯარიმდნენ.
კიდევ უფრო მცირე ხანს – 11:50 წუთს ითამაშა შერმადინმა, რა დროშიც მისი მონაგარი 2 ქულა (3-დან 1 ორქულიანი, 3-დან 0 საჯარიმო) და 6 მოხსნა გახლდათ. ქართველი ცენტრი ერთ ჯარიმას გამორჩა, მასზე კი თამაშის წესები ორჯერ დარღვიეს.
"ოლიმპიას” შემადგენლობაში საუკეთესონი ოზბოლტი (17 ქულა) და იაგოდნიკი (16) იყვნენ. იდენტური მაჩვენებლები ჰქონდათ სლოვანელთა ლიდერებს – დაპასა და კრუშიჩს.
ხსენებული წარუმატებლობის გამო, ლიუბლიანელებს ლიდერობის დათმობა მოუხდათ. ახლა, ოთხი მოგებით, პირველ პოზიციაზე "კრკა” იმყოფება, "ოლიმპია” და "ზლატოროგი” კი 3-3 გამარჯვებით, მეორე-მესამე ადგილებს იყოფენ. 9 აპრილს ქართველთა კლუბი სწორედ "ზლატოროგს” უმასპინძლებს.