მიუნხენის "ბაიერნის” ფორვარდმა მარიო გომესმა გაზეთ Bild-თან საუბარში იმედი გამოთქვა, რომ ბავარიული კლუბისთვის ბედნიერი დღე 14 მაისი იქნება. ამ დღეს, ბუნდესლიგის მიმდინარე სეზონის ბოლო ტური გაიმართება და "ბაიერნი” "შტუტგარტს” დაუპირისპირდება. გომესის გუნდს ჩემპიონის ტიტულის მოგების მხოლოდ თეორიული შანსი აქვს და რეალურად, სამეულში შესასვლელად და ჩემპიონთა ლიგის საგზურის მოსაპოვებლად იბრძვის. "იმედია, 14 მაისს სიხარულის საბაბი მოგვეცემა. ჩვენი ამოცანა ჩემპიონთა ლიგაზე გასვლაა და მიზანს სავარაუდოდ, "შტუტგარტთან” მოპოვებული ქულებით უნდა მივაღწიოთ. რა თქმა უნდა, გაცილებით უკეთესი იქნებოდა ჩემპიონები გავმხდარიყავით, მაგრამ ამ ეტაპზე მხოლოდ იმაზე ვფიქრობთ, რაც არარეალური არაა. ვინც ბუნდესლიგას მოიგებს, იმისი ნამდვილად შემშურდება, მაგრამ გულშემატკივრებს ვპირდები, გერმანიის ჩემპიონის ტიტულის დაბრუნებას მომავალ სეზონში შევეცდებით” – განაცხადა გომესმა.
|