საბჭოთა კავშირისა და ლიტვის საკალათბურთო ნაკრებების ლეგენდარულ ცენტრს, არვიდას საბონისს ეროვნული საკალათბურთო ასოციაციის (NBA) "დიდების დარბაზში” შეიყვანენ. აღნიშნულის შესახებ ინფორმაციას ნბა-ს ოფიციალური ვებ-გვერდი ავრცელებს.
ლიტველი კალათბურთელი "პორტლენდის” მაისურით, ოკეანის გაღმა 7 სეზონი ირჯებოდა, მისი საშუალო მონაგარი კი 12.0 ქულა და 7.3 მოხსნა გახლდათ. საბჭოთა კავშირის ნაკრების შემადგენლობაში, საბონისმა 1982 წელს - მსოფლიოს ჩემპიონატი, 1985-ში ევროპის ჩემპიონატი და 1988-ში ოლიმპიადა მოიგო, ლიტველებს კი ბარსელონას (1992) და ატლანტის (1996) ოლიმპიადებზე ბრინჯაოს მედლების მოპოვებაში დაეხმარა.
აგვისტოში დაგეგმილ ცერემონიალზე, არვიდას საბონისის გარდა, "დიდების დარბაზში” "ჩიკაგოსა” და "ლეიკერსში” ფილ ჯეკსონის თანაშემწე ტექს უინტერი, "დეტროიტისა” და "ჩიკაგოს” რიგებში ნბა-ს ხუთგზის ჩემპიონი დენის როდმანი, "გოლდენ სტეიტისა” და "ინდიანას” ფორვარდი, ორგზის ოლიმპიური ჩემპიონი კრის მალინი, "ბოსტონის” ყოფილი მოთამაშე და მწვრთნელი სატჩ სანდერსი, გუს ტატუმი, არტის გილმორი, ჰერბ მაგი, ტერეზა ედვარდსი და ტარა ვანდერვეერი მოხვდებიან.