მოლდოვის ჩემპიონატში XXXI ტური გაიმართა და მნიშვნელოვანი ქართული გოლი გამოერია. "დაჩიამ” სტუმრად 1:0 სძლია "ისკრა-სტალს” და ეს ერთადერთი ბურთი 69-ე წუთზე ქართველმა მცველმა დავით გამეზარდაშვილმა შეაგდო.
"დაჩიას” ქართველებიდან გამეზარდაშვილის გარდა, ლევან კორღალიძემ და მამუკა ლომიძემაც (შეცვლაზე) ითამაშეს.
დაჩიელთა კონკურენტმა "შერიფმა” "ოლიმპიასთან” სტუმრად 0:1 წააგო. "შერიფის” ქართველმა კაპიტანმა, 40 წლის ვაჟა თარხნიშვილმა 90 წუთი ითამაშა.
ამრიგად, "დაჩიამ” 3 ქულით გაუსწრო ვაჟა თარხნიშვილის "შერიფს” და ჩემპიონობის მშვენიერი შანსი აქვს. ეს თუ მოხერხდა, "შერიფის” კარგახნიანი მოლდოვური ჰეგემონია დასრულდება – ზედიზედ 10 სეზონია, ტირასპოლელები ჩემპიონები ხდებოდნენ და აი, მე-11 ცდაზე ძალიან უჭირთ.
კიშინიოვში, "ზიმბრუმ” 3:1 სძლია "გაგაუზიას” და მოგებულთაგან ბოლო 17 წუთი ითამაშა ვასილ ღუჭაშვილმა, რომელიც "დაჩიას” ეკუთვნის და განათხოვრებულია.